Umwiherero w’iminsi ibiri waberaga i Rwinkwavu ho mu karere ka Kayonza (21-22 Nzeri 2025) wahuje ubuyobozi bw’Intara, abayobozi b’inama njyanama z’uturere tugize iyi Ntara, abagize komite nyobozi z’utwo turere, abahagarariye ibigo bikorera muri iyi Ntaran’abandi bafatanyabikorwa wabaye umwanya wo kwigiranaho hagamijwe kwihutisha iterambere no guhindura imibereho y’umuturage.

Ubwo yasozaga uyu mwiherero, Guverineri w’Intara y’Iburasirazuba Rubingisa Pudence yavuze ko uyu mwiherero bawukoze mu gihe cyo gutangira igihembwe cya mbere cy’umwaka w’imihigo 2025/2026 hagamijwe kwisuzuma no kwibwiza ukuri ku bitagenda neza ndetse no kwigiranaho kugirango iterambere ry’Intara n’abaturage rikomeze kwihuta. 

Mu rwego rwo kwigiranaho, Abayobozi batandukanye bagaragaje uburyo butandukanye bakoresha mu gushyira mu bikorwa gahunda z’iterambere no guteza imbere imibereho y’abaturage.

 Abayobozi bunguranye ibitekezo ku ngamba zafasha mu kwihutisha iterambere no guhindura imibereho y'abaturage

Umwiherero wanatumiwemo bamwe mu bayobozi b’iimidugudu ndetse n’amasibo bikora neza kugirango batange ubuhamya bw’uburyo bakoresha.

Umuyobozi w’Umudugudu, wa Nkondo ya II uherereye mu Kagari ka Nkondo mu Murenge wa Rwinkwavu mu Karere ka Kayonza, Madamu Ingabire Joselyne yagaragarije abitabiriye umwiherero byinshi bagezeho muri uyu mudugudu babikesha ubufatanye bw’abayobozi mu nzego zose muri uyu Mudugudu. 

                   Abakuru b'Imidugudu basobanuye ibanga bakoresha mu kwesa Imihigo

Yavuze ko muri uyu mudugudu bafite uburyo bwo kwizigama binyuze mu kimina bise “Ibiramba” gihuza abatuye Umudugudu bose. Iki kimina kandi gifasha abaturage mu gutanga imisanzu ya EjoHeza, kwishyura ubwisungane mu kwivuza, bafite Moto ijyana umurwayi kwa muganga, kandi mu gihe umuturage yarwaye ahabwa amafaranga ibihumbi yo kumufasha kwivuza, ndetse umuturage wapfushije ahabwa amafaranga yo kumufasha muri ibyo byago.

Umuyobozi w’Akarere ka Gatsibo, Gasana Richard Richard yavuze ko umwiherero bawungukiyemi byinshi byatumye bikebura, “Aho twabonye hari ibibazo kandi twiyemeje ko tugiye kubikemura ni ugukoresha inzego zose, gufatanya n’abandi ntabwo twese turakora ngo umuyobozi w’akarere kugera ku Isibo babe bakora kimwe, ntabwo bose bakora bimwe ariko bakwiye kuba bakora kimwe nibyo bizatuma tugera ku ntego y’uko umuturage ari ku isonga”. Meya Gasana 

Ubuhamya n’ubutumwa bwatanzwe na Gatera Edouard- Umukuru w’isibo y’Abahizi, mu Kagari ka Gikaya, mu Murenge wa Nyamirama ndetse na Ingabire uyobora umudugudu wa Nkondo II bombi bagaragaje ko gukorana n’abaturage bituma intego yose wakwiha wayigeraho haba mu kwicungira umutekano, kugira ubuzima bwiza, kwizigama no gukorera hamwe, kurwanya umwanda no kwirinda ibyaha; ngo ibi byose ahari ubuyobozi bukorana n’abaturage birashoboka cyane.

Guverineri w’Intara, Pudence Rubingisa yasabye abayobozi gukomeza gukora cyane no guhanga udushya tugamije gukemura ibibazo bihari; kubaka ubushobozi bw’abakozi; gukora nk’ikipe mu kwihutisha ishyirwa mu bikorwa rya gahunda za Leta; guha abaturage serivisi nziza; no gukoresha ikoranabuhanga mu gukusasanya amakuru n’ibipimo ngenderwaho.