Kuri iki cyumweru tariki ya 20/04/2025, ku rwibuso rwa Jenoside yakorewe abatutsi mu 1994 rwa Sovu, ruherereye mu Murenge wa Kigabiro mu Karere ka Rwamagana habereye igikorwa cyo Kwibuka ku nshuro ya 31 Jenoside yakorewe Abatutsi mu 1994, by'umwihariko hibukwa Abagore n'Abana bazize Jenoside yakorewe Abatutsi mu 1994. Uru rwibutso rwa Jenoside rwa Sovu, ruruhukiyemo imibiri y'abatutsi 706, harimo Abana 385, Abagore 239 n'Abagabo 82 bishwe muri Jenoside yakorewe Abatutsi.

Umuyobozi w'Akarere Mbonyumuvunyi Radjab yavuze yagaragaje uruhare rw'Ubuyobozi bwari burangajwe imbere na Burugumesitiri Bizimana Jean Baptiste wayoboraga Komini Rutonde mu gihe cya Jenoside wanayoboye Jenoside yakorewe Abatutsi muri Komine yose, by'umwihariko Jenoside yakorewe Abatutsi aha ku ishuri ribanza rya Sovu, mu Bitare bya Rutonde no mu bitaro bya Rwamagana no ku ishuri rya St Aloys ndetse n'uwari Konseye wa Segiteri Sovu witwaga Turatsinze Framcois. Umurenge wa Kigabiro wonyine ufite inzibutso za Jenoside yakorewe Abatutsi 3.Uyu Bizimana yaje guhamwa n'ibyaha bya Jenoside yakorewe Abatutsi, akaba afungiye mu igororero rya Rwamagana.

Minisitiri w'uburinganire n'iterambere ry'umurango Mme Uwimana Consolée, Visi Perezida w'Inteko ishinga Amategeko umutwe w'Abadepite Hon. Uwineza Beline, Guverineri w'Intara, Rubingisa Pudence, intumwa za rubanda, inzego z'Umutekano, ubuyobozi bw'Akarere n'abandi bayobozi batandukanye bifatanyije n'abaturage b'Akarere ka Rwamagana n'inshuti zabo mu Kwibuka ku nshuro ya 31 Jenoside yakorewe Abatutsi mu 1994.