Kuri uyu wa Kane tariki ya 21 Gashyantare 2019, Nyakubahwa Ministiri w’Intebe Dr Edouar Ngirente yagiriye urugendo rw'akazi mu Ntara y'Iburasirazuba asura ibikorwa bitandukanye byo mu rwego rw'Ubuzima, Uburezi, Ubuhinzi n'Inganda mu Turere twa Gatsibo, Kayonza na Rwamagana.

Uru ruzinduko yarutangiriye mu bitaro bya Kiziguro mu Kare Gatsibo, asura ibice bitandimukanye by'ibi bitaro byubatswe mu mwaka wa 1985 ndetse n'aharimo kubakwa ibitaro bishya. Minisitiri w'intebe akaba yijeje ko agiye gukora ubuvugizi ku nzego bireba ngo ibitaro bishya byari byatangiye kubakwa birangire vuba kuko umubare w'abagana ibi bitaro bisanzwe ari munini ugereranyije n'ubushobozi bwabyo.

Minisitiri w'Intebe yakomereje uruzinduko rwe mu Ishuri ryisumbuye rya Nyagahandagaza ndetse Kaminuza y'uRwanda Ishami ry'uburezi rya Rukara biherereye mu Murenge wa Gahini mu Karere ka Kayonza.

Nyuma yo gusura inyubako zitandukanye z'iyi Kaminuza ndetse anagirana ibigananiro n'abakozi ndetse n'abanyeshuri b'iyi Kaminuza. Minisitiri w'Intebe yashimye ibimaze kugerwaho muri iyi Kaminuza abizeza ko Leta y’uRwanda ishyigikiye Uburezi kandi yiteguye gukomeza kubushyiramo imbaraga kuko ari umwuga iha agaciro kuko urwanda rwiyemeje kugera ku iterambere rishingiye ku bumenyi bityo abasaba gufatanya na Leta guharanira ko iyi ntego igerwaho.

Uruzinduko rwa Minisitiri w’Intebe mu Ntara y’Iburasirazuba yarushoreje mu Karere ka Rwamagana aho yasuye Ubuhinzi bw’indabo bukorerwa mu murenge wa Gishari ndetse n’icyanya cyahariwe inganda mu karere ka Rwamagana.

Ubu buhinzi bw’indabo bwasuwe bukorerwa kuri Hegitari 25, bukaba bwarahaye akazi abagera kuri 568. Minisitiri w’intebe Edouard Ngirente yashimye uruhare rw’uyu mushinga mu kwinjiza amadevize mu gihugu no guhindura imibereho y’abaturage. Minisitiri w’intebe kandi yanasuye uruganda rwa SteelRwa rukora “Fer à beton” mu byuma bishaje.
Nyuma yaho, Minisitiri w’intebe Dr Edouard Ngirente yasuye icyanya cyahariwe inganda, agaragarizwa uburyo inganda zigenda ziyongera, imbogamizi zikirimo ndetse n’ingamba zihari.

Minisitiri w’intebe yanasobanuriwe aho ubuyobozi bw’Akarere ka Rwamagana bugeze burwanya imirire mibi. Akaba yasabye ubuyobozi gukomereza aho ndetse no kwita ku bindi bibazo birimo gahunda yo kugaburira abana ku ishuli, isuku mu bigo by’amashuli n’imicungire y’amazi meza leta yahaye abaturage.