Mu ruzinduko Minisitiri w'Ubutegetsi bw'Igihugu Bwana Gatabazi Jean Marie Vianney yagiriraga muri iyi Ntara, uyu munsi yarushoreje mu Turere twa Ngoma na Bugesera kuwa 22/04/2021, yasuye icyumba Ntaramakuru (Situation room) cy'umurenge wa Sake n'icyumba Ntangamakuru cy'ikigo Nderabuzima cya Rukoma giherereye muri uyu murenge ashima uruhare iyi gahunda igira mu kwita ku bibazo bigaragara no kubishakira ibisubizo.

Minisitiri Gatabazi ari kumwe na Guverineri CG Emmanuel K. Gasana n'abandi bayobozi basobanuriwe imikorere y'ibyumba Ntangakuru nk’imwe muri gahunda zibafasha gukora igenamigambi no gukemura ibibazo bikigaragara.

Umuyobozi w’Ikigo nderabuzima cya Rukoma Sr Godeberthe Uwimana yabwiye aba bayobozi ko icyumba ntangamakuru kuri iki kigo gikubiyemo amakuru yose ajyanye n’imihigo ijyanye n’ubuzima mu murenge wa Sake nk'arebana n'ubuzima bw’umwana n’umubyeyi, kuboneza urubyaro, indwara z’ibyorezo nk’igituntu na Virusi itera Sida, abajyanama b’ubuzima n’imikorere yabo, n’andi atandukanye.

Sr Uwimana, umuyobozi w’icyo kigo nderabuzima cya Rukoma yasobanuye ko iyi gahunda y’icyumba ntangamakuru bayitekereje nyuma yo kubona ko gukora badafite amakuru nyayo ngo bamenye ahakenewe gushyirwa imbaraga nyinshi n’ingano y’ubushobozi bukenewe ngo bishyirwe mu bikorwa.

Yavuze ko ubu amakuru yose arebana n’ubuzima bw'abaturage bagana iki kigo nderabuzima n’indwara zikunda kuhagaragara n’ibindi bibazo baba bayafite bikabafasha gushyiraho ingamba zo guhangana n’ibyo bibazo.

Minisitiri 'Ubutegetsi bw'Igihugu, Bwana Gatabazi Jean Marie Vianney wari kumwe na Guverineri CG Emmanuel Gasana n'abandi bayobozi muri uru ruzinduko, yashimiye ku murimo mwiza bakora, asaba ko iyi gahunda ikwiriye no gukorwa mu bundi bigo nderabuzima no mu zindi nzego zose kugirango iterambere n'imibereho myiza y'ahaturage bigerweho