Ku wa 23 Nzeri 2024, Minisitiri w’Uburezi, Joseph Nsengimana ari kumwe n’umunyamabanga wa Leta Madamu Irere Claudette na Guverineri w'Intara Rubingisa Pudence bayoboye inama yaguye y’uburezi mu Ntara y’Iburasirazuba, igamije kuganira ku ishusho y’uburezi muri iyi minsi ya mbere y'itangira ry'umwaka w’amashuri 2024/2025, kurebera hamwe imbogamizi zihari n'ingamba zo kuzamura ireme ry'uburezi muri iyi Ntara.

Iyi nama yitabiriwe n'Ubuyobozi bw'Uturere, Ubuyobozi bw'Ikigo Gishinzwe Guteza Imbere Uburezi mu Rwanda (REB), ubuyobozi bw'Ikigo gishinzwe Ibizamini bya Leta n'Ubugenzuzi bw'Amashuri (NESA), Abayobozi b'ibigo by'amashuri bahagarariye abandi, Abashinzwe Uburezi mu Turere n'abandi bafatanyabikorwa batandukanye.

Mu ijambo rye, Guverineri Rubingisa yashimiye abitabiriye iyi nama yaguye y'uburezi mu Ntara y'Iburasirazuba, agaragaza ko ari umwanya wo kurebera hamwe uko bateza imbere ireme ry'Uburezi mu mashuri yose yo muri iyi Ntara. Guverineri yongeyeho ko muri iyi Ntara, abayobozi mu nzego zitandukanye muri iyi Ntara biyemeje ubufatanye mu guharanira ko abana bose bagana ishuri ntawe usigaye, gushyira imbaraga mu bukangurambaga bw'isuku no gutera ibiti ku mashuri hagamijwe kurwanya ibiza.

Minisitiri w'Uburezi Dr Joseph Nsengimana yashimiye ubuyobozi bw'Intara bwaateguye inama yaguye y'Uburezi. Agaragaza ko bikwiye ko buri mwana abona ishuri yigamo, akarigumamo kandi agahabwa uburezi bufite ireme bumutegurira guhangana n'ibibazo by'ejo hazaza hashingiwe kuri NST2 na Vision 2050. 

Minisitiri yavuze ko hazashyirwa imbaraga mu kwegera ababyeyi ababyeyi b’abanyeshuri kugirango bagire ubuhare mu gushakira umuti ibibazo bigaragara mu burezi, kuko abanyarwanda muri rusange inshingano y’uburezi ari iya buri wese.