Kuri uyu wa 01 Ukwakira 2021, Minisitiri w'Ubuhinzi n'ubworozi Dr Mukeshimana Geraldine ari kumwe n'Umunyamabanga wa Leta muri Minisiteri y'Ubutabera ushinzwe ibyerekeye itegeko Nshinga n'andi mategeko akaba n'imboni ya Guverinoma mu Karere ka Gatsibo, Hon. Nyirahabimana Solina, Guverineri w'Intara CG Emmanuel K. Gasana n'abandi bayobozi mu nzego zitandukanye bifatanyije n'abaturage b'Umurenge wa Rugarama mu Karere ka Gatsibo mu gutangiza igihembwe cya mbere cy'ihinga 2022 A.

Abayobozi n'abaturage bakaba bateye imbuto y'ibigori mu gishanga cya Cyampirita giherereye muri uyu Murenge wa Rugarama gifite ubuso bwa Hegitari mirongo itanu (50Ha), kikaba gihingwa n'abibumbiye muri Koperative KOPECUMA.

Minisitiri Dr. Mukeshimana yashimiye abahinzi n'aborozi intambwe n'umuhate bagira mu kazi bakora, abibutsa ko hakiri urugendo mu bijyanye no kongera umusaruro w'ibikomoka ku buhinzi n'ubworozi, abasaba gukomeza gukorana umurava.

Guverineri w'Intara, CG Emmanuel K. Gasana yabwiye abitabiriye igikorwa cyo gutangiza igihembwe cy'ihinga cya 2021A ko Intara ifite icyerekezo cyo kuba ikigega cy'Igihugu cy'ibikomoka ku buhinzi n'ubworozi.

Kugirango bigerweho, Guverineri CG Emmanuel K. Gasana yavuze ko harimo gushyirwa imbaraga mu bukangurambaga bugamije kongerera abahinzi n'aborozi ubumenyi bwo guhinga no korora neza, kwita ku matungo n'imyaka no gufata neza umusaruro hagamijwe kugira umusaruro ube mwinshi, mwiza woherezwa ku isoko bityo umuturage akomeze gutera imbere.

Muri iki gihembwe cy'ihinga cya mbere (Season 2022A) mu Ntara y'Iburasirazuba hakazahingwa ibihingwa byatoranyijwe (Ibigori, ibishyimbo, soya, umuceri, imyumbati ) ku buso busaga ibihumbi 240.