Kuri uyu wa kabiri tariki ya 20/04/2021, Minisitiri w'ubutegetsi bw'igihugu, Bwana Gatabazi Jean Marie Vianney yatangiye uruzinduko rw'iminsi itatu mu Ntara y'Iburasirazuba.

Uru ruzinduko Minisitiri Gatabazi yarutanguriye mu Karere ka Nyagatare, aho ari kumwe na Guverineri CG Emmanuel K. Gasana, umuyobozi Mukuru wa Polisi y'u Rwanda IGP Dan Munyuza

n'abandi bayobozi batandukanye basuye ibikorwa by'iterambere birimo uruganda rw'amazi rwa Cyondo na Poste de santé ya Karambo n'ibindi.

Urugomero rw'amazi rwa Cyondo rufite ubushobozi bwo gutunganya amazi angana na Meterokibe ibihumbi bitanu magana atanu ku munsi (5,500m³/day), rukaba rutanga amazi mu Mirenge itandukanye y'Akarere ka Nyagatare.

Ivuriro ry'ibanze (Poste de santé) rya Karambo ni rimwe mu mavuriro y'ibanze 4 yongewemo serivisi zo kuvura amaso, kuvura amenyo, gukeba/gusiramura no kubyaza hagamijwe kurushaho kwegereza abaturage serivisi z'ubuvuzi.

Muri uru ruzinduko, Minisitiri Gatabazi n'abandi bari kumwe bagiranye ibiganiro n'abayobozi b'imidugudu n'abandi bayobozi mu nzego zitandukanye zegereye abaturage bo mu mirenge ya Kiyombe,Karama,Tabagwe, Nyagayarr, Rwempasha, Musheri, Matimba na Rwimiyaga

Minisitiri yashimiye abayobozi mu nzego zegereye abaturage uruhare bagira mu gukangurira abaturage gushyira mu bikorwa gahunda za Leta, abasaba gushyira imbaraga mu kubungabunga umutekano, kurwanya magendu n'ibindi byaha byambukiranya imipaka, guha abaturage serivisi nziza kandi zinoze no gukemura ibibazo by'abaturage.

Abayobozi b'imidugudu n'abandi bayobozi mu nzego zegereye abaturage bakaba basinye imihigo imbere ya Minisiriri w'Ubutegetsi bw'Igihugu n'abandi bayobozi bari kumwe, biyemeza kongera imbaraga mu kubungabunga umutekano, barwanya ibiyobyabwenge na magendu,ihohoterwa iryo ari ryo ryose n'ibindi byaha byambukiranya imipaka.