Imirimo yo kubaka amazu azatuzwamo imiryango yagizweho ingaruka n’imirimo yo kubaka Urugomera rw’Amashanyarazi rwa Rusumo iri kugana ku musozo. Biteganyijwe ko iyi miryango izahabwa aya mazu mu ntangiriro z’umwaka wa 2026.

Imiryango isaga 80 ni yo izatuzwa muri izi nzu ziri kubakwa mu Murenge wa Kigarama, mu Kagari ka Nyankurazo, hafi y'umupaka wa Rusumo uhuza u Rwanda na Tanzania. Usibye izi nzu, abazatuzwamo begerejwe ibindi bikorwa remezo by’ibanze, birimo irerero (Early Childhood Development – ECD), ndetse banubakiwe ibiraro by’amatungo, mu rwego rwo guteza imbere imibereho yabo.