Kuri uyu wa Kabiri taliki 15 Mata 2024 mu Murenge wa Kibungo, ku rwibutso rwa Jenoside Yakorewe Abatutsi, habaye igikorwa cyo Kwibuka ku nshuro ya 31 Jenoside Yakorewe Abatutsi mu 1994 no gushyingura mu cyubahiro imibiri 8 y’Abatutsi bishwe muri Jenoside yakorewe abatutsi mu 1994.

Iki gikorwa cyitabiriwe n’abayobozi batandukanye barimo Umunyamabanga Nshingwabikorwa w’Intara y’Iburasirazuba, Dr. Nyirabahimana Jeanne, ubuyobozi bw’Akarere ka Ngoma, inzego z’umutekano, imiryango ifite ababo bashyinguye muri uru rwibutso ndetse n’abaturage batuye mu Mirenge ya Kibungo, Remera, Rukira, Murama na Kazo.

Mu ijambo yagejeje ku bitabiriye iki gikorwa, Dr. Nyirabahimana Jeanne yashimangiye ko Kwibuka ari umwanya wo gusubiza agaciro abishwe bazira uko bavutse, no gukomeza kubaka ubumwe n’ubudahernwa bw’Abanyarwanda. Yagize ati: “Nihanganishije abarokotse jenoside yakorewe abatutsi ndasaba gukomera mukomeze guharanira kwiteza imbere, ndasaba abaturage mwese muri hano gukomeza guhangana n'ingengabitekerezo ya Jenoside twirinde ikintu cyose gishobora gusenya ubumwe bwacu”. 

Yakomeje asaba urubyiruko by’umwihariko gukomeza kurwanya ingengabitekerezo ya Jenoside, gutanga amakuru ku bajyanye imibiri y’abazize Jenoside itaraboneka, no gukomeza kubakira ku mateka yaranze igihugu cyacu kugira ngo amateka mabi atazasubira ukundi.

Urwibutso rwa Jenoside rwa Kibungo rushyinguyemo imibiri isaga ibihumbi 25 y’abatutsi bazize Jenoside yakorewe abatutsi mu 1994.

Tariki ya 15 Mata 1994, Interahamwe zishe abatutsi benshi bari bahungiye kuri Economat Kibungo ndetse no mu bitaro bya Kibungo. 

Amateka ya Jenoside yakorewe Abatutsi muri aka gace kahoze ari ama Komini ya Kigarama, Birenga, Sake,Rukira agaragaza ko hari imitwe yitwara gisirikare yari yarateguwe; yaranatojwe ndetse n'uruhare rw'abayobozi nka Col Pierre Celestin Rwagafirita; Depite Mutabaruka Sylvan, Habimana Emmanuel bitaga Cyasa wari ukuriye umutwe w’interahamwe muri Kibungo yose mu 1994 n'abandi.