Kuri uyu wa Kabiri tariki ya 05/02/2019, Abasirikare bakuru biga mu ishuri rikuru rya gisirikare rya Nyakinama (RDF senior command and staff college) basuye intara y’Iburasirazuba mu rwego rwo kongera ubumenyi ku bikorwa bikorerwa abaturage n’uburyo inzego z’ibanze zifasha abaturage gukemura ibibazo bibugarije. Uru rugendoshuri rufite insanganyamatsiko igira iti “imirire mibi inzitizi ku mahoro arambye, Umutekano n’iterambere.

Iri tsinda ry’abasirikare bakuru bari mu ntara y’iburasirazuba rigizwe n’abanyeshuri 16,kuri icyi kiciro cya 7 abasirikare bakuru bitabiriye baturuka mu bihugu bya Uganda, Tanzaniya, Kenya, Ghana, Senegal, Ethiopia, Malawi,Nigeria, Zambia n’u Rwanda.

Guverineri w’intara y’Iburasirazuba yasobanuriye iri tsinda ry’abasirikare bakuru biga i Nyakinama ko Intara y'Iburasirazuba ari Intara ikungahaye ku buhinzi n'ubworozi ndetse imiterere yayo yorohereza gukora ubuhinzi bukoresheje imashini (Mechanisation), ndetse 40% by'inka zose zo mu gihugu zibarizwa mu Ntara y'Iburasirazuba.

Yabwiye iri tsinda ko Ubushakashatsi ku mibereho y'Abaturage (EICV5-2017) bwagaragaje ko Umubare w'Abaturage batuye iyi Ntara wiyongereye ku kigereranyo cya 14.2% ukaba ugeze kuri 2,998,000 mu gihe mu ibarura rusange ry'Abaturage n'Imiturire rya 2012 ryagaragaraga ko Abatuye Intara bari 2,595,703, uku kwiyongera ahanini kukaba guterwa n'Abimukira usanga baturuka mu zindi ntara.

Guverineri avuga ko nubwo hari byinshi byagezweho ariko ko hakigaragara n'ibibazo birimo n'ikibazo cy'imirire ibi mu bana ariko ko kubufatanye bw'inzego zitandukanye iki kibazo kirimo gushakirwa ibisubizo.
Avuga ko hashyizweho zimwe muri gahunda zo guhangana n’ikibazo cy’imirire mibi harimo kwifashisha igikoni cy’umudugudu,Guhugura Abajyanama b’Ubuzima, Koroza amatungo imiryango icyennye cyane, guha amata abana ku ishuri hibandwa ku bana mu mashuri y’incuke n’ibindi.

Yavuze ko inzego zitandukanye zirimo Ubuyobozi bw’inzego z’ibanze, inzego z’umutekano, Abafatanyabikorwa batandukanye zifatanya mu gukurikirana no kurwanya ikibazo cy’imirire mibi umunsi ku wundi kuburyo ubona birimo gutanga umusaruro mu guhangana n’iki kibazo. Mu rwego rwo kureba uko inzego zifatanya mu guhangana n'iki kibazo, basuye Icyumba gikusanyirizwamo amakuru agendanye n'Imirire mibi ndetse n'ibindi bibazo bibangamiye imibereho myiza y'Abaturage mu Karere ka Rwamagana kizwi nka "Situation Room". Umuyobozi w'Akarere Bwana Mbonyumuvunyi Radjyab akaba yasobanuriye aba banyeshuri ko iki cyumba gifasha ubuyobozi gukurikirana umunsi ku wundi uko iki kibazo kigenda gikemuka muri aka Karere

Guverineri Mufulukye kandi yavuze ko zimwe mu mbogamizi zituma iki kibazo kigaragara harimoe ikibazo cy’amakimbirane mu miryango, aho aya makimbirane aba intandaro ya bamwe mu babyeyi batita kungo zabo, Ibiyobyabwenge nabyo bigira uruhare mu guteza amakimbirane no kutita ku nshingano z’ingo n’ibindi.

Major Nzabandora Joseph ni umwe muri aba banyeshuri wavuze mu izina rya bagenzi be, yagize ati: twasobanuriwe uburyo ubuyobozi bufatanya n’abaturage mu kurwanya ikibazo cy’imirire mibi, twashimye aho mugeze n’ingamba mwafashe zituma murushaho kurwanya imirire mibi.