Kuwa 08 Werurwe 2025, mu Ntara y’Iburasirazuba hatangijwe icyumweru cyahariwe ibikorwa byo kwimakaza ihame ry’uburinganire. Iki cyumweru cyateguwe n’Intara y’Iburasirazuba ku bufatanye  n’Urwego rushinzwe kugenzura iyubahirizwa ry’Ihame ry’Uburinganire n’Ubwuzuzanye bwa’Abagore n’Abagabo mu Iterambere ry’Igihugu (GMO).

Umuhango wo gutangiza iki cyumweru wanahujwe no kwizihiza umunsi mpuzamahanga w’umugore. Umunyamabanga Nshingwabikorwa w’Intara ari kumwe na Hon Senateri Mukabalisa Donatille, Abadepite, n'abandi bifatanyije n'ubuyobozi bw'Akarere ka Bugesera n'abaturage mu kwizihiza Umunsi Mpuzamahanga w'Umugore no gutangiza icyumweru cyahariwe ibikorwa byo kwimakaza ihame ry’uburinganire mu Ntara y’Iburasirazuba

Ni icyumweru gifite insanganyamatsiko igira iti “ Kwimakaza Ihame ry’uburinganire, imbarutso y’imiyoberere myiza n’iterambere ridaheza kandi rirambye.”

Hon. Senateri Mukabalisa yashimye intambwe imaze guterwa mu kwita no guteza imbere umugore, asaba buri wese kwirinda amakimbirane yo mu ngo no mu muryango kuko bidindiza iterambere ryawo n'igihugu.

Umunyamabanga Nshingwabikorwa w’Intara Dr Jeanne Nyirahabimana yasabye buri wese kuganira ku ihame ry'uburimganire n'ubwuzuzanye kugira ngo ryumvikane neza bityo byifashe umuryango kubaho neza.

Biteganyijwe ko muri iki Cyumweru cy’uburinganire n’ubwuzuzanye hazakorwa ibindi bikorwa birimo kwandika abana batari banditse mu bitabo by’irangamimerere, ibiganiro ku bo mu nzego z’ibanze, ibiganiro n’abangavu babyaye imburagihe ndetse n’ababyeyi babo hagamijwe kubagarurira icyizere.