Ku gicamunsi cyo kuri iki cyumweru, kuri Stade ya Ngoma habereye ibirori byo gusoza irushanwa ry'Umurenge Kagame Cup 2025 ku rwego rw’Intara y’Iburasirazuba; 

Ibirori byitabiriwe na Guverineri w'Intara y'Iburasirazuba Rubingisa Pudence ari kumwe n’Abayobozi b’Uturere, nzego z’umutekano ndetse n'abaturage benshi baturutse mu Turere dutandukanye tugize iyi Ntara baje gushyigikira amakipe yabo.

Mu mikino itandukanye yabereye muri aka Karere, mu mukino wa Basketball, Akarere ka Kayonza ni ko kegukanye igikombe mu bagore gatsinze Bugesera 50-14, mu bagabo Kayonza itsinda Rwamagana 53-46.

Mu mukino wa Volleyball mu bagore, Akarere ka Ngoma kegukanye igikombe gatsinze Kayonza amaseti 3-0 naho mu bagabo, Akarere ka Ngoma gatsinda Bugesera amaseti 3-0

Mu mupira w’amaguru, mu bakobwa igikombe cyegukanywe n'Umurenge wa Gahara itsinze uwa Fumbwe ibitego 2-0; naho mu bahungu Ikipe y'Umurenge wa Kirehe yegukanye igikombe itsinze uwa Murambi ya Gatsibo kuri Penaliti 4-3, iminota isanzwe yari yarangiye amakipe anganya 1-1. 

Mu butumwa Guverineri Rubingisa yagejeje ku bitabiriye iki gikorwa, yashimiye abagize uruhare mu gutegura aya marushanwa, amakipe yitabiriye by'umwihariko ayageze ku mukino wa nyuma asaba ayabonye itike yo kuhagararira Intara ku rwego rw'Igihugu kuzitwara neza akazatahana ibikombe.

"Muri aya Marushanwa y'Umurenge Kagame Cup, abaturage baritabiriye ku bwinshi kandi ku mikino itandukanye kuko twahisemo imiyoborere idaheza. Turashimira amakipe yose yitabiriye ndetse n'ayegukanye ibikombe, turabasaba kurushaho kwitegura kugira ngo muzaheshe ishema Intara yacu kandi turabashyigikiye"

Yasabye abaturage gukomeza umuco wo kwitabira siporo, kuko gukora siporo bifasha mu kugira ubuzima bwiza.

Yibukije abaturage kandi ko Igihugu kigiye kwinjira mu minsi 100 yo Kwibuka ku nshuro 31 Jenoside yakorewe Abatutsi mu 1994, abakangurira kuzitabira gahunda n'ibikorwa bitandukanye byateganyijwe muri iki gihe cyo Kwibuka."