Kuri uyu wa Gatatu taliki ya 27 Kanama 2025, mu Murenge wa Kiramuruzi habereye igikorwa cyo gusoza umushinga w’iterambere wakozwe n’Umufatanyabikorwa World Vision ku nsanganyamatsiko igira iti: “Ubufatanye mu iterambere rirambye 2009-2025”.

Uyu mushinga watangiye gukorera mu Murenge wa Kiramuruzi mu mwaka wa 2009, ukaba umaze imyaka 17 ufatanya n’Akarere ka Gatsibo mu Murenge wa Kiramuruzi mu guteza imbere imibereho myiza y’abaturage.

Uyu mushinga wafashije abaturage binyuze mu bikorwa byo gufasha umwana, kugeza amazi ku baturage, kubaka ingo mbonezamikurire/ECD’s n’ibikokorwa by’ubuzima.

Umuyobozi w’Akarere wungirije ushinzwe iterambere ry’ubukungu Sekanyange Jean Leonard yashimiye uruhare rwa World Vision mu kuzamura iterambere ry’imibereho myiza y’abaturage binyuze mu guteza imbere umwana. Ati: Twagendanye urugendo rurerure muri iyi myaka 17 ishize kuva muri 2009-2025 hagamijwe guteza imbere umuturage’’.

Sekanyange Jean Leonard yagize ati: ‘’Turashimira Umufatanyabikorwa wacu wa World Vision, twafatanyije byinshi mu kuzamura iterambere ry’imibereho myiza y’abaturage. Turasaba abaturage kurinda ibyagezweho ndetse no kubibyaza ibindi byinshi’’.

Pauline Okumu, Umuyobozi mukuru wa World Vision mu Rwanda yashimiye ubuyobozi bwite bwa Leta bafatanyije mu guteza imbere abaturage, ati: Twafatanyije byinshi kandi twabigezeho, ibi byose twari tugamije guteza imbere umuturage twese hamwe’’.

Guverineri w’Intara y’Iburasirazuba Pudence Rubingisa wari umushyitsi mukuru muri uyu muhango, yashimiye uruhare rw’abafatanyabikorwa mu kuzamura imibereho n’iterambere ry’abaturage, avuga ko ibikorwa bya World vision bigaragara hirya no hino mu Ntara y’Iburasirazuba.