Kuri uyu wa Gatanu tariki ya 22 Gashyantare 2019, muri EPIC Hotel mu Karere ka Nyagatare habereye inama nyunguranabitekerezo ku iterambere ry’ubukerarugendo mu Ntara y’Iburasirazuba. Ni inama yayobowe na Guverineri w’Intara y’Iburasirazuba Bwana Mufulukye Fred n’Umuyobozi ushinzwe Ubukerarugendo mu Kigo cy’Igihugu gishinzwe iterambere (RDB) Madamu Belise Kariza, initabirwa n’abayobozi b'Uturere, iz'abikorera, Abashoraari mu rwego rw’Ubukerarugendo n’izindi.

Atangiza iyi nama, Guverineri Mufulukye yashimiye RDB kuba yarahisemo gutegura iyi nama kugirango higwe uburyo amahirwe mu ishoramari ry’ubukerarugendo agaragara muri iyi Ntara yabyazwa umusaruro. Guverineri yabwiye abitabiriye iyi nama ko Intara y’Iburasirazuba ifite amahirwe menshi mu bukerarugendo, uhereye ku mirerere y’iyi Ntara ifite imirambi ishashe, Parike y'Akagera, Ibiyaga byinshi, Amahoteli meza, kuba ihana imbibi n’ibihugu 3 bigize umuryango wa Afurika y’Iburasirazuba EAC (Uganda, Tanzania and Burundi) ikaba ari irembo ry’umuhoro wo hagati (central corridor) uhuza u Rwanda n’ibice by’Ibihugu duturanye n’icyambu cya Mombasa. Ibi ni bimwe mu mahirwe dufite ’Intara, kandi afite aho ahuriye n’iterambere ry’Ubukerarugendo mu gihugu cyacu. Uretse ibi kandi iyi Ntara ifite n’ahandi hantu henshi hafite ibimenyetso by’amateka arimo n’ay’urugamba rwo kubohora Igihugu.

Umuyobozi ushinzwe Ubukerarugendo mu Kigo cy’Igihugu gishinzwe iterambere (RDB) Madamu Belise Kariza yavuze ko Ubukerarugendo ari inkingi ikomeye mu iterambere ry’Igihugu ariyo mpamvu RDB ifatanyije n’izindi nzego yifuza kubyaza umusaruro amahirwe mu bukerarugendo agaragara muri iyi Ntara. Yavuze ko mu mwaka wa 2017 Igihugu cyakiriye abakerarugendo basaga 94,000 barimo 38% bo mu gihugu na 62% baturutse mu mahanga bose bakaba barinjirije Igihugu agera kuri US$ miliyoni 18.6. Yavuze ko Pariki y’Akagera ariyo Pariki yasuwe n’abantu benshi mu mwaka wa 2017 bangana n’ibihumbi 44 (44,000) yinjiza Miliyoni y’Amadolari y’Amerika ibi bikaba bitanga icyizere ko n’andi mahirwe ahari aramutse abyajwe umusaruro byarushaho guteza imbere igihugu.

Nyumayo kungurana ibitekerezo ku mahirwe agaragara muri iyi Ntara mu bukerarugendo n’icyakorwa ngo abyazwe umusaruro, imwe mu myanzuro yavuyemo ni uko hemejwe ko Ubuyobozi bwa RDB, Inzego z’ibanze, Abikorera n’izindi nzego bakomeza gufatanya n’Uturere, hakagaragazwa ahakwiye kwibandwaho muri buri Karere ndetse n’uruhare rwa buri rwego kandi bigashyirwa mu igenamigambi ry’Uturere.

Iyi nama ibaye nyuma yo gusura hamwe mu hantu nyaburanga na ndangamateka ho mu Ntara y'Iburasirazuba harimo Umusozi wa Fumbwe (Rwamagana), Utubindi twa Rubona n'Urutare rwa Ngarama (Gatsibo), Ingoro y'Umwami Mutara III Rudahigwa ya Mimuli, Agasozi ka Nyabwishongwezi ahaguye Intwari y'u Rwanda Nyakwigendera Maj. Gen. Fred Gisa Rwigema mu rugamba rwo kubohora Igihugu hamwe n'Ishyamba ry'imikinga rikikije Umugezi w'Umuvumba (Nyagatare). #Rwanda#VisitRwanda