Kuri iki Cyumweru tariki ya 29 Kamena 2025, Guverineri w’Intara y’Iburasirazuba, Bwana Pudence Rubingisa, ari kumwe na Perezida w’Ihuriro ry’Abafatanyabikorwa b’Akarere ka Bugesera (JADF), Bwana Murenzi Emmanuel, basoje Imurikabikorwa ry’Abafatanyabikorwa b’Akarere ka Bugesera ryabereye kuri Stade ya Bugesera.

Iki gikorwa kizwi ku izina rya JADF Open Day cyahurije hamwe abafatanyabikorwa batandukanye bakorera mu Karere ka Bugesera, bagaragaza ibikorwa byabo bigamije guteza imbere imibereho myiza y’abaturage.

Guverineri Rubingisa yashimiye abafatanyabikorwa ku ruhare rukomeye bagira mu iterambere ry’Akarere no mu guhindura imibereho myiza y’abaturage. 

Yagize ati: “Imbaraga mufatanya n’Akarere mu bikorwa bitandukanye bigaragarira mu musaruro uhamye abaturage bageraho. Dukomeze ubufatanye bwiza, dushyira imbere inyungu rusange n’imibereho myiza y’umuturage.”

Perezida wa JADF Bugesera, Bwana Murenzi Emmanuel, nawe yashimye uko abafatanyabikorwa bitabiriye iki gikorwa, agaragaza ko ari umwanya mwiza wo gusangira ibyagezweho no kungurana ibitekerezo ku buryo ibikorwa byabo byarushaho kugera ku muturage.

Murenzi yashimye imikoranire myiza n'ubufatanye n'Akarere mu bikorwa biteza imbere abaturage. Yavuze kandi ko iri murikabikorwa ryabafashije kugaragaza ibyo bakora n’abaturage bakabona umwanya wo gusobanuza kuri serivisi zitandukanye batanga.

Iri murikabikorwa ry’abafatanyabikorwa b’akarere ka Bugesera ryashojwe, ryari rimaze iminsi itatu [27-29 Kamena 2025] ribera kuri Stade ya Bugesera rimurikirwamo ibikorwa by’abafatanyabikorwa mu burezi, ubuhinzi, ubuvuzi, ubworozi, guteza imbere urubyiruko, kurengera ibidukikije n’ibindi.