Guverineri w'Intara y'Iburasurazuba, Rubingisa Pudence n'abandi bayobozi bari kumwe basuye ibikorwa bitandukanye by’iterambere mu Karere ka Ngoma; ashima urwego bigezeho n’uruhare bifite mu guteza imbere aka Karere n’abaturage muri rusange.

Mu mishinga inyuranye minini, Akarere ka Ngoma hamwe n’abandi bafatanyabikorwa barimo gushyira mu bikorwa, Guverineri Rubingisa ari kumwe n’abagize komite y’umutekano itaguye y’Intara, basanze hari intambwe ishimishije imaze guterwa mu bikorwa biganisha ku iterambere n’imibereho myiza y’abaturage.

Muri iyo mishinga harimo hotel yo ku rwego rwo hejuru yubakwa ku kiyaga cya Sake, uruganda rw’amazi rwubakwa ku kiyaga cya Mugesera ruzakemura ikibazo cy’amazi meza muri ako Karere. Uru ruganda ruzaba rufite ubushobozi bwo gutunganya meterokibe ibihumbi 33 z’amazi ku munsi, mu rwego rwo gukemura ikibazo cy'ibura ry'amazi mu mirenge itandukanye igize aka Karere.

Guverineri yanasuye umuhanda Ngoma-Ramiro ureshya na Kilometero 52 hamwe n’imishinga y’ubuhinzi. Ni imishinga Guverineri Rubingisa yishimira urugero igezeho anasaba abayobozi kuba hafi y’abaturage.

Akarere ka Ngoma kavuga ko imirimo yo kubaka uruganda rw’amazi ku kiyaga cya Mugesera igeze ku gipimo cya 40%, kubaka umuhanda Ngoma Ramiro bikaba bigeze ku gipimo cya 31%.

Mu biganiro yagiranye n’abayobozi mu nzego zitandukanye zikorera mu Karere ka Ngoma, Abanyamabanga Nshingwabikorwa b'Imirenge n'abayobozi b'amashami ku Karere, Guverineri Rubingisa yasabye abayobozi kuzirikana ko mu byo bakora byose umuturage agomba kuba ku isonga, kwegera abaturage no kubakangurira by’umwihariko gufata neza umusaruro w'ibihingwa, kwizigamira birinda kugurisha umusaruro wose.