Guverineri w’Intara y’Iburasirazuba Pudence Rubingisa arikumwe n’abagize Inama y’Umutekano itaguye y’Intara basuye Akarere ka Gatsibo hagamijwe gusura bimwe mu bikorwa by’iterambere ry’Akarere, kureba uburyo bishyirwa mu bikorwa, isuku n’isuku n’isukura, imitangire ya serivise n’uburyo bwo kwakira, gusesengura no gukemura ibibazo by’abaturage.

Bimwe mu bikorwa byasuwe birimo: Uruganda rutunganya amazi rwa muhazi, uruganda rwa Gatsibo Food processing rutunganya umuceri, Kawunga n’ibicanwa bikomoka ku bisigazwa by’ibihingwa bitandukanye n’iduka ry’umuhinzi ririmo kubakwa na Koperative ihinga umuceri ya Coproriz Ntende ifite icyicaro mu Murenge wa Rugarama.

Munyaburanga Emmanuel, Perezida wa Koperative Coproriz Ntende ihinga umuceri n’ibigori mu gishanga cya Ntende gikora ku Mirenge ya Rugarama, Gitoki na Rwimboga yo mu Karere ka Gatsibo n’Umurenge wa Murundi wo mu Karere ka Kayonza yavuze ko iduka ry’umuhinzi ari uburyo bwiza bwo kwegereza serivise abanyamuryango.

Guverineri w’Intara y’Iburasirazuba Pudence Rubingisa yavuze ko ibikorwa byasuwe by’iterambere bifitiye umumaro abaturage bihereye ku gutanga akazi mu rwego rwo kuzamura imibereho n’iterambere ry’abaturage.

Gahunda y’abagize Inama y’Umutekano itaguye y’Intara yo gusura ibikorwa bitandukanye by’iterambere mu Karere ka Gatsibo yatangiye kuva taliki ya 20-21 Mutarama 2026.