Guverineri Pudence Rubingisa, yasabye abayobozi b'inzego z'ibanze n'iz'abikorera guhuza igenamigambi mu gukura abaturage mu bukene no gukemura ibibazo bikigara

Ku gicamunsi cyo kuri uyu wa Gatanu, mu Karere ka Kayonza habereye ibiganiro byahuje ubuyobozi bw'Intara,Uturere n'abayobozi b'urugaga rw'abikorera ku rwego rw'Intara n'Uturere harebwa aho Imihigo ya PSF igeze ishyirwa mu bikorwa, imbogamizi zihari n'ingamba zo gukomeza kwihutisha iterambere.

Umuyobozi w'Urugaga rw'abikorera mu Ntara, Benedata Laurien yashimiye ubufatanye bwaranze ubuyobozi bw'Intara n'ubw'Uturere n'abikorera muri iki gihe gishize. Mu mwaka ushize, Abagize PSF baremeye imiryango 60 itishoboye, kubaka inzu 10 bifite agaciro ka Miliyoni zisaga 130 n'ibindi bikorwa byakozwe, anagaragaza aho bageze mu gushyira mu bikorwa imishinga y'iterambere itandukanye ikubiye mu mihigo ya PSF.

Guverineri w'Intara Pudence Rubingisa, yasabye abayobozi b'inzego z'ibanze n'iz'abikorera kurushaho gukorana bya hafi, guhuza igenamigambi kugirango imishinga n'ibindi bikorwa biri gukorwa bifashe mu gukura abaturage mu bukene no gukemura ibibazo bikigaragara.

Guverineri yasabye by'umwihariko abayobozi b’inzego z’ibanze gukomeza kwegera inzego z'abikorera no kubafasha mu kwihutisha ishoramari, kumenyekanisha ibyo abikorera bakora, kunoza imitangire ya serivisi, kugaragaza amahirwe mu ishoramari ahari no kuyabyaza umusaruro.