Ku wa Kane tariki ya 26/11/2020, Guverineri w'Intara y'Iburasirazuba,Mufulukye Fred ari kumwe n'umuyobozi w'Ingabo mu Ntara y'Iburasirazuba n'Umujyi wa Kigali,Gen Mubarak Muganga  Ubuyobozi bw’Akarere n'abandi bayobozi b'inzego zitandukante basuye Imirenge ya Kiyombe na Karama.

Muri uru ruzinduko; aba bayobozi banakoranye inama n'abayobozi mu nzego zitandukanye (abavuga rikumvikana) bo muri iyi Mirenge, abasaba kugira uruhare mu kubungabunga ibikorwa by'iterambere byagezweho no guhangana n'ibiyobyabwenge, magendu n'amakimbirane mu miryango.

Guverineri yasabye abaturage kubyaza umusaruro ibikorwa by'iterambere nk'imihanda; amasoko n'ibindi begerejwe bityo bakiteza imbere, aboneraho no gutangiza gahunda igamije guca amakimbirane mu ngo no gukemura ibibazo bibangamiye umuryango yiswe "Mwiwusenya Turahari"

Muri gahunda ya "Mwiwusenya Turahari" ingo zibanye neza ziratoranywa zikagira uruhare mu gukemura amakimbirane mu ngo z’abaturanyi.Muri buri mudugudu; hatorwa abagabo 3 n'abagore 3 b'inyangamugayo batigeze amakimbirane mu ngo zabo bagafasha guhuza imiryango ifitanye amakimbirane.

Guverineri yasabye abayobozi mu nzego zitandukanye gufata iya mbere mu gukurikirana ishyirwamubikorwa ry'iyi gahunda ya "Mwiwusenya Turahari" no kugira uruhare mu kwishakamo ibisubizo by'ibibazo by'imiryango.

Aba bayobozi kuva ku rwego rw'imidugudu bijeje Guverineri w'Intara ko bagiye kurushaho kugira uruhare mu kubungabunga umutekano, guca magendu n'ibiyobyabwenge muri iyi mirenge ituriye umupaka w'u Rwanda na Uganda.