Mu gitondo cyo kuri uyu wa Kabiri taliki ya 29 Nyakanga 2025, mu Kagari ka Nyabikiri mu Murenge wa Kabarore mu Karere ka Gatsibo habereye igikorwa cy’umuganda udasanzwe cyari kigamije gusibura umuferege utandukanya ikigo cya Gisirikare cya Gabiro n’abaturage.

Uyu muganda wari ugamije gusiba inzira no gukumira abaturage bavogera ikigo cya Gisirikare cya Gabiro bikabangamira ibikorwa by’umutekano bihakorerwa.

Abaturage bavogera ikigo cya Gisirikare cya Gabiro bajya kuragirayo amatungo yabo, gushaka inkwi, gucukura amabuye y’abaciro ndetse bivugwa ko bamwe mu baturage batema ibiti bagatwika amakara.

Mu rwego rwo gukumira ibikorwa bitandukanye bibangamira ibikorwa by’umutekano bikorerwa mu kigo cya Gisirikare cya Gabiro, haherutse gufatwa icyemezo cyo gukumira abaturage kwinjira muri iki kigo bari baremerewe kwahiramo ubwatsi bw’amatungo yabo.

Nyuma y’umuganda udasanzwe wakozwe uyu munsi, Guverineri w’Intara y’Iburasirazuba arikumwe n’inzego zitandukanye z’ubuyobozi, bakanguriye abaturage kwirinda kubangamira ibikorwa by’umutekano bikorerwa mu Kigo cya Gisirikare cya Gabiro.

Igikorwa cyo gusibura umuferege utandukanya ikigo cya Gabiro n’abaturage ni ukugirango ntihakongere kujyamo abaturage bajya kuragiramo amatungo yabo ndetse n’ibindi bikorwa abaturage bakorayo.