Ku wa Gatanu tariki ya 13 Ugushyingo 2020, Minisitiri w’Uburinganire n'Iterambere ry'Umuryango Prof Bayisenge Jeannette;ari kumwe na Guverineri w’Intara y’Iburasirazuba Mufulukye Fred bayoboye inama mpuzabikorwa ngarukamwaka n’Abayobozi mu nzego zitandukanye zikorera muri iyi Ntara mu rwego rwo kuganira ku ngamba zikomatanyije zo gukemura ibibazo bibangamiye umuryango.

Iyi nama yabereye muri East Gate Hotel y’Akarere ka Ngoma; abayobozi baganiriye ku bibazo bikigaragara bibangamiye umuryango harimo amakimbirane mu miryango, gusambanya abana bamwe bikabaviramo gutwita bakiri bato , ihohoterwa rishingiye ku gitsina , imirimo mibi ikoreshwa abana , imirire mibi itera kungwingira ndetse n’ikibazo cya gahunda mbonezamikurire y’abana bato.

Guverineri Mufulukye yavuze ko muri iyi Ntara hari gahunda nyinshi zashyizweho zigamije guhangana n’ibibazo bibangamiye umuryango; harimo gukora ubukangurambaga bwiswe “Turengere Umwana” bwakorewe mu Turere tugize iyi Ntara, gahunda yitwa “Mwiwusenya Turahari” yatangijwe mu Murenge wa Sake, ikaba imaze gufasha imiryango myinshi gukemura amakimbirane n’ibindi.

Guverineri yavuze ko inzego zose zirebwa n’imibereho myiza y’umuryango muri iyi Ntara haba inzego z’ibanze, inzego z’umutekano, amadini n’amatorero biteguye gukomeza gufatanya mu gukomeza guhangana n’ibibazo bibangamiye umuryango.

Minisitiri w’uburinganire n’iterambere ry’umuryango Prof Bayisenge Jeanne yashimiye ko hari udushya tugenda duhangwa mu gukemura ibibazo bibangamiye umuryango.

Nyuma yo gusura umudugudu wa Nyagasozi mu murenge wa Sake mu Karere ka Ngoma, aho yasuye icyumba ntangamakuru ndetse na gahunda yiswe “Mwiwusenya turahari” , aho ingo zibanye neza zitoranywa zikagira uruhare mu gukemura amakimbirane mu ngo z’abaturanyi.

Minisitiri yavuze ko iyi ari gihamya ko abanyarwanda bafite ubushobozi bwo kwishakamo ibisubizo; Umuryango ushoboye kandi utekanye ukaba ushoboka buri wese abigize intego.

Minisitiri prof. Bayisenge yasabye abitabiriye iyi nama ko ibi bibazo byose bikibangamiye umuryango bakomeze kubigira ibyabo, ndetse no gufatanya mu kubaka umuryango ushoboye kandi utekanye.