Ku wa Gatanu yariki ya 13 Kamena 2025, mu Karere ka Kayonza hateraniye inama Nyunguranabitekerezo ku iterambere ry'Intara y’Iburasirazuba, abayitabiriye bararebera hamwe uko Intara ihagaze mu bipimo birimo Ubukungu, imibereho myiza n'imiyoborere myiza banafata ingamba zo kurushaho kwihutisha iterambere.

Ni inama yari ifite insinganyamatsiko igira iti: "Iterambere n’imibereho myiza by’umuturage biri mu bubasha bwacu". Yitabiriwe n'abayobozi kuva ku rwego rw’Akagari kugera ku rwego rw’Intara, abayobozi b’inzego z’abikorera, Abahagarariye urubyiruko, abagore, abafite ubumuga, inzego z'umutekano, abahagarariye ibigo bya Leta bikorera muri iyi Ntara ndetse n'abafatanyabikorwa batandukanye.

Abitabiriye iyi nama bagaragarijwe ishusho rusange y’Intara mu bipimo bitandukanye, birimo ubuhinzi n’ubworozi, ibikorwaremezo bitandukanye byubatswe hiryo no hino mu Ntara, umutekano, gufasha abaturage kwivana mu bukene n’ibindi.

Guverineri Rubingisa yasabye abitabiriye iyi nama kugira ubufatanye mu kwihutisha iterambere rishingiye ku muturage, kongera imbaraga mu bukangurambaga, gukemura ibibazo bibangamiye imibereho y’abaturage, kunoza imitangire ya serivisi no kugira imidugudu itarangwamo ibyaha.

Abateraniye muri iyi nama bashimye ko igipimo cy'ubukene mu Ntara y’Iburasirazuba cyaragabanutse kiva kuri 39.1% mu 2017 kigera kuri 26.8% mu 2024, aho abantu bagera kuri miliyoni umwe n’igice bavuye mu bukene nk’uko byagaragajwe mu bushakashatsi bwa 7 ku mibereho y’ingo.