Ku wa 16 Gicurasi 2025 Guverineri w’Intara y’Iburasirazuba Rubingisa Pudence ari kumwe n’abagize inama y’umutekano itaguye y’Intara bifatanyije n’abakozi b’Intara mu kwizihiza Umunsi mpuzamahanga w’Umurimo, ku nsanganyamatsiko igira iti: “Ihangwa ry’Umurimo, intego dusangiye"

Mu kwizihiza uyu munsi, abakozi bose bari kumwe n’abayobozi bagejejweho ikiganiro cy’uyu munsi w’umurimo cyatanzwe n’Umunyamabanga Nshingwabikorwa w’Intara Dr Jeanne Nyirahabimana kijyanye n’imyitwarire mbonezamurimo ku bakozi ba Leta no gukora kinyamwuga yibutsa abakozi ko bagomba kurangwa n’imyitwarire mbonezamurimo mu bikorwa bakora, ko amahame n’indangagaciro bigenga imyitwarire myiza y’Umukozi no gukora kinyamwuga. 

Mu butumwa yagejeje ku bayobozi n'akozi b'Intara bitabiriye ibi birori, Guverineri Rubingisa yashimiye abayobozi n’abakozi bose muri rusange ku kazi bakora, avuga ko buri wese akwiye guharanira gutanga umusaruro w’urwego akorera, Gukora arizigamye, guteza imbere ubumenyi bukenewe ku isoko ry’umurimo hagamijwe kunoza no kuzamura umusaruro ndetse no guha umwanya abaturage bakabatega amatwi bakabakemurira ibibazo.

Muri ibi birori hanatangajwe umukozi w'indashyikirwa wahize abandi muri uyu mwaka wa 2024/2025, ariwe NDAHIRO Richard, usanzwe ari Umuyobozi ushinzwe igenamigambi n’ingengo y’imari ku Ntara.

Guverineri yasabye abakozi gukomeza kunoza umurimo abizeza ko ubuyobozi bw’Intara buzakomeza kubaba hafi kugirango bashobore gushyira mu bikorwa inshingano zabo neza, biganisha mu kwihutisha iterambere ry’Intara no guteza imbere imibereho myiza y’abaturage.