Umunyamabanga Nshingwabikorwa w'Intara, Dr Jeanne Nyirahabimana, yasabye abitabiriye iyi nama haba abo mu nzego za Leta, abikorera n'abafatanyabikorwa mu iterambere gukomeza ubufatanye no guhuza imbaraga mu kwihutisha iterambere n'imibereho myiza y'umuturage.

Ibi yabigarutseho kuri uyu wa 28 Mata 2025, ubwo yatangizaga inama nyunguranabitekerezo igamije kugaragaza iby'ingenzi bikubiye mu iteka rya Minisitiri w'Intebe rigenga uburyo bwo kwegereza abaturage inzego z'imirimo (PMO on Sectoral Decentralization) na gahunda ya kabiri y'Igihugu yo kwihutisha iterambere, izwi nka NST2.

Iyi nama yabereye mu Karere ka Rwamagana, yateguwe ku bufatanye bwa Minisiteri y'Ubutegetsi bw'Igihugu na Minisiteri y'Imari n'Igenamigambi, yitabiriwe n'Abanyamabanga Nshingwabikorwa b'Uturere, Abayobozi b'amashami mu Karere, abahagarariye Urugaga rw'Abikorera- PSF, Abahagarariye Ihuriro ry'Abafatanyabikorwa b'Akarere mu Iterambere -JADF n'abandi bafatanyabikorwa.